《成功與失敗的距離》

最近工作上出現問題，有張單做錯要重做，問返同事原因係咩，...

《成功與失敗的距離》

最近工作上出現問題，有張單做錯要重做，問返同事原因係咩，佢答得好有條理，因為一二三所以出現咁既問題，佢都無辦法，搞掂返件事後，搵同事坐低傾，我問佢覺得呢件事上面，自己有冇責任，佢話無，我點頭，的確唔係佢既錯，但我同佢講左一個故事。

Steve Jobs生前好鍾意講一個分享，有日佢發現自己辦公室無清潔，問返清潔工點解唔打掃，清潔工佢答，因為換新鎖，佢無鎖匙入唔到去，所以無清潔，咁SJ都好理解，隨後，佢將呢個情況同佢既管理層同事分享，問大家，清潔工有冇錯，大家都覺得合理，無錯。

SJ話，清潔工無錯，因為佢係清潔工，做唔到，做錯，有原因，咁就完結，但人之所以有高低，係因為大家係處事上面有唔同經驗同處理，如果一個CEO，佢講出一個好合理既原因去分析自己錯誤，呢個一定唔係好既CEO，因為愈高位置就愈唔容許失敗。

失敗乃成功之母，成功都係建立在失敗之上，無人天生就一帆風順沒失敗過。

但失敗有三種，一，失敗連自己錯咩都搞唔清楚；二，失敗後可以總結出原因，牢牢記住永不再犯；三，將所有風險同可能性都計算好，將失敗機會減到接近零。

我同同事講，今日你錯，過去左就算，下次唔好再錯同樣既事，如果唔係你就只會永遠身處最低既位置；如果你可以唔錯同類既事，咁你已經係第二種人，但呢種人只可以講係Senior Level；去到Managemnet Level的話，你係要令事情唔會錯，同埋你要開始面對下屬犯既錯，唔單止要自己唔錯，更要令下面既人都唔錯先得。

做任何事都係，做到九成，有一成出錯，大家會覺得都合理，人誰無過，始終經咁多人，忙中有錯又有幾出奇？

但呢個世界，有一部份人，你係佢身上搵唔出一成錯既機會，當你同佢企埋一齊，唔會有人會選擇九成，而唔係十成。

忙中有錯，人多手腳亂，時也命也，不可抗力等等，都合理，大家會理解，會體諒，同時，人地都會將你標籤成為一個可能會出錯既人，到搵到一個比你更強既人時，就會放棄你，因為無人喜歡冒險。

可以解釋到，點解兩個都係三年經驗既人，人工可以相差一倍甚至幾倍，唔係你做幾多年就係經驗，而係你經驗可以為件事帶來幾多價值。

Executive 同 Management 既分別在於，前者係收命令執行，要完全做足，如果你做足都出事，責任唔在你；後者係你制定計劃，再執行，如果做足計劃都出事，就係你既計畫唔夠完善，考慮唔夠多，經驗唔夠。

好多人唔明自己點解一直停留係Executive，因為思維仲係停留係有原因地失敗既程度。

我唔係話失敗係問題，我都成日錯，但我唔會甘於錯完再錯，當你不斷做好，所有事係你手都好令人放心時，你就可以到達另一個層次。

以前我會覺得失敗乃成功之母，兩者係不能分離。

依家我會覺得，你愈遠離失敗，你就離成功愈近。

---